Estienne Gouws en Catharina Bok

Stamvader André Gouws se oudste seun, Estienne, of Steven soos hy ook bekend was, is op 6 Maart 1718 getroud met Catharina Bok. Sy was die dogter van Christian Bock, uit Wolfenbutel, Noord-Duitsland, en Anna Groothenning van Bengale.

Bock was 'n 27-jarige soldaat toe hy aan die Kaap gearriveer het in 1696 saam met Hans Casper Geringer, 'n bakker. Hy en Geringer het 'n besigheidsvennootskap aangegaan.

Anna Groothenning was 'n slavin uit Bengale in Indië en die eiendom van Geringer. Hy het in 1703 by haar 'n dogter, Maria, gehad. Anna Groothenning het daarna 'n verhouding met Christiaan Bok aangegaan en vier kinders is daaruit gebore. In 1709 het Geringer Anna en haar kinders bevry. Hulle is almal op Nuwejaarsdag 1713 as Protestante gedoop in Kaapstad, en op 5 Februarie van daardie jaar het Christiaan Bok met haar getrou.

Dit was nie ongewoon vir blanke mans aan die Kaap om met slavinne uit Indië of Indonesië te trou nie: hulle was geen barbare nie, maar in baie gevalle opgevoede vrouens. Valentijn, in  Bescrijvingen Vol III no 2 p136, sê: "De vrouwen zyn door de bank veel schooner, netter besneden van wezen, en veel blanker, dan menig andere vrouwen ... waarom zy by die meeste Hollanders voor alle andere slavinnen gezogt worden, te meer dewyl zy seer fraai van oogen, mooi, dog wat plat van weezen, zeer vriendelijk, lieftallig, n doorgans zeer beleeft en wel opgevoed zyn. ... Deze vrouwen zyn in haar ijgenland ook zeer moedig, en trots, en weten haar fatsoen zoo wel, als de beste Hollandze juffrouw, te houden"

Catharina Bok was Christiaan en Anna Bock se tweede kind. Sy is in 1705 gebore en was dertien jaar oud toe sy met Estienne Gouws getroud is op 27 Februarie 1718.

Haar jonger suster Johanna is (op 14-jarige leeftyd) in 1724 met Andries Bester getroud en is die stammoeder van die Besters in Suid-Afrika.

Christiaan Bock is in 1716 dood en sy weduwee Anna het daarna nog 'n kind, Jacob, gehad uit 'n verhouding met Jacob Marik in 1718.

Estienne Gouws en Catharina Bok het twee seuns en vyf dogters gehad:

• Stephanus, 1720
• Anna, 1721
• Catharina, 1723
• Christina, 1725
• Sara, 1727
• Clara, 1732
• Andries Stephanus, 1740, getroud met Maria Hendrina Mulder